Lokual bo mester sa di AVG

Lei di Protekshon di Dato Personal BES

For di 10-10-2010, Lei di Protekshon di Dato Personal BES (na hulandes, Wbp BES) ta na vigor na Hulanda Karibense. E leinan di privasidat di Hulanda Karibense ta eksigí pa bo kumpli minimalmente ku e siguiente kriterionan.

Ordenansa pa Protekshon General di Data

Entrante dia 25 di mei 2018, Ordenansa pa Protekshon General di Data (na hulandes, ‘Algemene Verordening Gegevensbescherming’ òf AVG) lo drenta na vigor na e parti europeo di Hulanda. Pa interkambio di dato entre Hulanda Karibense i Hulanda Europeo, nos ta rekomendá pa tuma e siguiente medidanan.

Prinsipio

Sòru sigui e prinsipionan di Wbp BES ora bo ta prosesá dato personal. En general, e prinsipionan akí ta kuadra ku esunnan di AVG.

Outorisashon

Si bo ta prosesá dato a base di outorisashon di e persona konserní, e persona konserní mester por sa ta kiko e ta duna outorisashon p’e. AVG tin regla mas estrikto pa loke ta trata outorisashon. Bo mester por proba ku bo a risibí outorisashon bálido di e persona konserní pa prosesá su datonan. KONDISHON: E persona konserní mester por retirá su outorisashon mes fásil ku e por dun’é.

Akuerdo di prosesamentu

Si bo ta laga un tersero prosesá e datonan pa bo, sòru pa esei sosodé a base di un akuerdo di prosesamentu. Determiná si bo akuerdonan di prosesamentu eksistente ta kumpli ku e reglanan fihá den AVG pa akuerdo di prosesamentu i si esei no ta e kaso, hasi e kambionan nesesario.

Resúmen di dato prosesá

Identifiká ki dato personal bo ta prosesá i ku ki meta bo ta prosesá nan, di unda bo a haña e datonan i ken bo ta kompartí nan kuné.
DIKON: Bo mester por demostrá ku bo ta prosesá dato personal manera e leinan vigente ta preskribí. Ademas, bo tin mester di e informashon akí den kaso ku un persona konserní apelá na su derechonan di privasidat (eksigí pa mustr’é su datonan, koregí nan òf kita nan).

Funshonario enkargá ku privasidat

AVG ta obligá sierto organisashon nombra un enkargado di protekshon di dato (na hulandes, ‘functionaris voor de gegevensverwerking’ òf FG). Na Hulanda Karibense, esei no ta un obligashon. Sinembargo: Si bo ta prosesá dato personal spesial òf ta prosesá dato na gran eskala, ta rekomendabel pa bo nombra un funshonario enkargá ku privasidat. Pa determiná si esei ta e kaso, bo por hasi un ‘análisis di impakto di privasidat’ pa identifiká kua ta e riesgonan di bo prosesamentu, i despues tuma medida pa redusí e riesgonan ei.

Privacy by design en privacy by default

Sòru inkorporá e normanan di privasidat eksistente den bo prosesonan di trabou. Sòru tuma medida adekuá (teknológiko i organisatorio) pa protehá e datonan.

Protekshon: Sòru pa protehá e datonan, teknológiko i tambe e datonan organisatorio