Protekshon di dato personal

Komo promedio, un hende su datonan por ta den sentenar i asta míles di fail tantu di negoshi komo di gobièrnu. Tur hende mester por konfia ku nan datonan personal ta bon protegé. Si e protekshon no ta adekuá, esei por hiba na lèkmentu di dato i hende por hasi mal uso di nan, por ehèmpel pa kometé froude di identida.

Lèkmentu di dato
Ta papia di lèkmentu di dato ora un persona haña akseso na dato personal òf haña e posibilidat di destruí, modifiká òf publiká nan sin ku esei tabata intenshon di e organisashon en kuestion. Ku otro palabra, no ta papia di lèkmentu di dato solamente ora dato sali na kla (lèk), sino tambe ora un persona òf organisashon prosesá nan na un manera ilegal.

Medida di protekshon

Pa prevení lèkmentu di dato, Lei di protekshon di dato personal BES (Wbp BES) ta bisa ku negoshi i organisashon di gobièrnu ku ta usa dato personal tin ku protegé esakinan. Wbp BES ta bisa ku pa hasi esei nan tin ku tuma medida teknológiko i organisatorio adekuá.
Esei ta nifiká ku un organisashon tin ku usa teknologia moderno pa protegé e datonan personal. Ademas, e no tin ku pensa riba teknologia so, sino tambe riba kon nan, komo organisashon, ta atendé ku dato personal. Por ehèmpel, ken tin akseso na kua dato?
Un organisashon ku ta bai rekolektá dato personal tin ku pensa di antemano kon e ta bai protegé esakinan. I protekshon di dato personal mester ta un punto di atenshon kontinuo den un organisashon.

Kiko un organisashon tin ku hasi pa protegé mi datonan personal?

Si un organisashon, por ehèmpel un tienda riba internèt kaminda bo a kumpra algu, tin dato personal di bo, e organisashon ei tin deber di tuma medida adekuá pa protegé bo datonan.

No usa mas dato ku loke ta nesesario
E organisashon tin ku sòru di no rekolektá mas dato personal ku loke ta berdaderamente nesesario, ni usa e datonan pa mas tantu kos ku ta berdaderamente nesesario. Por ehèmpel, semper ku ta posibel, nan por kita bo nòmber i otro karakterístika ku por identifiká bo, for di den bo datonan. Ademas, mayoria di bes un organisashon no tin mester di tur bo datonan personal pa por kumpli ku un meta, por ehèmpel pa manda faktura.

Limitá akseso na dato
Ademas, e organisashon tin ku limitá akseso na bo datonan personal. Mas hende tin akseso na e datonan, mas chèns tin ku por usa nan na un manera robes. Institushon di kuido, manera hospital por ehèmpel, tin ku pèrkurá pa nan empleadonan outorisá ta e únikonan ku tin akseso na fail digital di pashènt.

Uso di teknologia di protekshon moderno
Un organisashon tin ku protegé bo datonan personal na un manera ku ta kuadra ku e nivel di desaroyo teknológiko na e momento ei. Esei ta nifiká ku e organisashon no tin mag di usa teknologia antikuá pa protegé bo datonan. Di e manera ei hacker, por ehèmpel, lo tin poko òf niun chèns di pone man riba bo datonan personal.

Kiko mi por paga tinu kuné ora mi ta duna un organisashon mi datonan via internèt?

Tin bes bo tin ku login na un wèpsait òf hinka bo datonan personal, por ehèmpel ora bo ta usa Internèt banking, wèpsait di findishi i tienda online. Si bo ke manda informashon delikado, manera bo datonan di tarheta di krédito, ta importante pa bo usa un konekshon di internèt protegé. Si e konekshon di internèt ta protegé, e adrès den e bara ariba di bo browser lo kuminsá ku https:// na lugá di e http:// ku bo ta mira normalmente.

Bo ke sa mas? Wak e 10 tepnan di siguridat pa internèt, riba wèpsait di Nationaal Coördinator Terrrorismebestrijding en Veiligheid..

Un organisashon tin mag di usa mi datonan pa tèst un sistema di kòmpiuter?

Nò, esei no tin mag. Un organisashon ku tin bo datonan personal no tin mag di usa e datonan akí pa ningun otro meta. Pa tèst sistema di kòmpiuter tin mag di usa solamente dato fiktisio (inventá) òf dato personal di tiki riesgo, por ehèmpel dato públiko ku ta aparesé riba wèpsait públiko.

Ki mi por hasi si mi tin un pregunta òf keho tokante e manera ku un organisashon ta protegé mi datonan personal?

Semper, akudí promé na e organisashon mes ku bo pregunta òf keho. Si tin un keho anto abo i e organisashon no ta logra yega na un solushon, tin algun paso adishonal ku bo por tuma.