Wardamentu di dato personal

Den un fail digital òf di papel tin hopi informashon tokante un persona. Un pashènt su dòkter di kas, por ehèmpel, sa ki remedi e ta usa. I un doño di trabou por mira ki dia a subi salario di su trahadó delaster biaha. Pa un organisashon por tin un bon atministrashon, e tin ku warda algun dato personal durante sierto tempu. Pero un organisashon no tin mag di warda e datonan ei mas tantu tempu ku ta nesesario sí.
Lei di protekshon di dato personal BES (Wbp BES) no ta preskribí konkretamente kuantu tempu por warda dato personal. Kada organisashon por disidí kon largu e ta warda dato. Pa disidí esei, e organisashon tin ku wak kuantu tempu e datonan ta nesesario pa e meta pa kua a rekolektá nan òf pa kua ta usa nan. Tin algun otro lei ku sí ta fiha konkretamente kon largu un organisashon tin mag di warda dato.

Kuantu tempu mi doño di trabou tin mag di warda mi datonan?

Tin sierto dato den bo fail di empleado ku bo doño di trabou tin ku warda pasobra lei fiskal ta eksigí esei. Ku otro palabra, Belastingdienst ta obligá bo doño di trabou di warda e datonan ei pa sierto tempu. Algun dato asina ta bo deklarashon di loonbelasting. Bo doño di trabou tin ku warda nan sinku aña despues ku bo sali for di servisio.
Pa e otro datonan di bo fail di empleado, lei no ta fiha kon largu mester warda nan. Komo norma, ta warda e datonan ei dos aña despues ku bo sali for di servisio.

Kuantu tempu un organisashon tin mag di warda mi datonan di solisitut?

Normalmente, un organisashon lo eliminá bo datonan di solisitut mas tardá kuater siman despues ku e prosedimentu di solisitut terminá. Sinembargo, abo mes por duna nan pèrmit pa warda bo datonan mas largu, por ehèmpel, por si akaso un vakatura presentá den futuro ku ta pas pa bo. Den un kaso asina, un plaso rasonabel ta no mas ku un (1) aña despues ku e prosedimentu di solisitut termin.

Kuantu tempu mi dòkter di kas tin mag di warda mi datonan médiko

E regla prinsipal ta ku bo dòkter di kas òf spesialista tin ku warda bo fail médiko no ménos ku 15 aña despues ku a stòp bo tratamentu.

Kuantu tempu skol tin mag di warda dato di mi yu?

Generalmente, skol tin mag di warda fail di un alumno dos aña despues ku bo yu a stòp di bai e skol ei. Pa sierto situashon, legislashon riba tereno di enseñansa ta fiha un periodo mas largu.

Kuantu tempu tin mag di warda imágen di kámara?

Tin mag di warda imágen di kámara di lugá públiko no mas ku kuater siman. Pero si e imágen ta mustra echo kastigabel i e por sirbi komo evidensia den un proseso penal, por alargá e periodo durante kua por warda e imágen.
Pa otro imágen di kámara, por ehèmpel di den tienda, tambe e periodo pa warda nan ta kuater siman. Pero si e imágen ta mustra un insidente, manera ladronisia den tienda, e doño di tienda tin mag di warda e imágen te ora ku kaba di atendé esei.

Kuantu tempu un organisashon di gobièrnu tin mag di warda mi datonan?

A base di Wbp BES, un organisashon tin mag di warda dato personal tanten ku e datonan akí ta nesesario pa e meta pa kua a rekolektá nan òf pa kua ta usa nan. Ora esei no ta e kaso mas, e organisashon tin ku destruí e datonan.

Kiko un organisashon tin ku hasi ku mi datonan ora e tempu durante kua tin mag di warda nan a pasa?

Si e periodo durante kua nan tin mag di warda bo datonan personal a pasa, òf si bo datonan no ta nesesario mas, e organisashon tin ku destruí bo datonan.
Un organisashon tin ku trata dato personal ku kuidou. P’esei e organisashon tin ku pensa bon kon e ta bai destruí bo datonan, i mas ainda si e datonan ta dato delikado manera dato médiko. Pa dato digital por ehèmpel, tin sistema diseñá pa destruí nan outomátikamente na un momento ku por spesifiká di antemano.

Si un organisashon ke digitalisá bo fail ku ta riba papel, e organisashon no tin mag di destruí e fail original riba papel te ora ku e organisashon a kaba di regla un bon sistema di protekshon pa e fail digital.

Archivo
Un organisashon tin mag di warda dato personal den un archivo, basta ta pa meta históriko, statístiko òf sientífiko. Lei no ta stipulá kuantu tempu tin mag di warda dato personal den archivo. E organisashon tin ku destruí e datonan ora nan no ta nesesario mas pa meta di e archivo.

Mi por pidi pa kita mi datonan personal?

Bo tin derecho di pidi un organisashon kita sierto dato personal di bo. Bo por hasi esei den kaso ku e datonan ta inkorekto, inkompleto òf den kaso ku nan no ta relevante (mas).

Ki mi por hasi si mi tin un pregunta òf keho tokante e kantidat di tempu ku un organisashon ta warda mi dato personal?

Semper, akudí promé na e organisashon mes ku bo pregunta òf keho. Si bo tin un keho anto abo ku e organisashon no por yega na un solushon, tin algun paso adishonal ku bo por tuma.