Fasilitashon di dato personal

Un organisashon no tin mag di kompartí dato personal ku otro persona òf instansia sin mas. E regla general ta ku tin mag di kompartí dato personal solamente si esei ta kuadra ku e meta pa kua a rekolektá e datonan. Si esei ta e kaso òf nò ta dependé di e sirkunstansianan konkreto di kada kaso. Ku otro palabra, e por varia di un kaso pa otro.

Kuadra ku e meta
Pa kontestá e pregunta si un fasilitashon ta kuadra òf nò, tin diferente faktor ku tin ku tene na kuenta. Por ehèmpel:

  • kiko e fasilitashon di dato tin di aber ku e meta pa kua a rekolektá e datonan;
  • e tipo di dato en kuestion;
  • e konsekuensianan ku un fasilitashon di dato lo por tin;
  • ki medida a tuma komo garantia;
  • kiko e persona konserní (esun ku e organisashon ta usa su datonan personal) ta spera.

Base pa fasilitá dato
Ademas di e regla general ku ta bisa ku e fasilitashon mester ta kuadra, ta asina tambe ku e fasilitashon mester ta basá riba un di e seis basenan fihá den artíkulo 8 di Lei di protekshon di dato personal BES (Wbp BES). Nan ta:

  • outorisashon di e persona konserní;
  • nesesidat di nan pa por kumpli ku un akuerdo;
  • obligashon legal;
  • interes vital di e persona konserní;
  • nesesidat di nan pa kumpli ku un tarea di atministrashon públiko;
  • interes hustifiká di e organisashon.

Un organisashon tin mag di fasilitá mi datonan personal ku mi outorisashon?

Sí, esei tin mag. Un organisashon por fasilitá bo datonan personal na un otro organisashon si esei ta nesesario pa kumpli ku un akuerdo ku bo. Por ehèmpel, si bo a bestèl un telefòn selular serka un kompania di telekomunikashon, e kompania ei por duna bo datonan personal na un kompania ku ta ofresé servisio di entregat.

Un organisashon tin mag di fasilitá mi datonan personal pa kumpli ku un akuerdo?

Sí, esei tin mag. Un organisashon por divulgá bo datonan personal na un otro organisashon si esei ta nesesario pa kumpli ku un akuerdo ku bo. Por ehèmpel, si bo a bestèl un telefòn selular serka un kompania di telekomunikashon, e kompania ei por duna bo datonan personal na un kompania ku ta ofresé servisio di entrega.

Un organisashon tin mag di fasilitá mi datonan personal pa protegé un interes vital di mi persona?

Sí, esei tin mag. Un nesesidat médiko urgente, por ehèmpel, ta un interes vital. Pero ta mihó si e organisashon pidi bo outorisashon. Ta solamente si esei no por mas, por ehèmpel pasobra bo no ta na tinu, un organisashon tin mag di fasilitá bo datonan personal sin bo outorisashon.

Un organisashon tin mag di fasilitá mi datonan personal pa kumpli ku un tarea di atministrashon públiko?

Un organisashon di gobièrnu tin mag di fasilitá bo datonan personal si esei ta nesesario pa kumpli debidamente ku un tarea di atministrashon públiko. E tarea por ta unu di e organisashon mes òf di e organisashon di gobièrnu ku ta risibí e datonan.
Por ehèmpel, Ministerio Públiko (MP) por duna un kompania di seguro informashon tokante un echo kastigabel, manera un kaso di froude, pa di e manera ei por rekuperá e daño for di esun ku a kometé e echo. Un divulgashon asina ta basá riba MP su tarea di, entre otro, sirbi interes di esnan ku bira víktima di echo kastigabel.

Un organisashon tin mag di fasilitá mi datonan personal pa protegé un interes hustifiká?

Sí, un organisashon tin mag di fasilitá bo datonan ora ta nesesario pa sirbi un interes hustifiká di e organisashon, por ehèmpel pa por kumpli ku un tarea ku ta parti di su operashon normal òf pa atministrashon diario di e organisashon.

Sinembargo, e organisashon tin ku puntra su mes si e no por logra e mesun resultado usando ménos dato òf na un manera ku tin un efekto ménos drástiko riba bo privasidat. Ademas, e organisashon tin ku hasi un evaluashon di privasidat. Esei ta nifiká ku e organisashon tin ku pisa bo interes personal kontra interes ku e ke sirbi dor di fasilitá bo datonan.