Kiko ta dato personal?

Lei di protekshon di dato personal BES (Wbp BES) ta bisa ku tur dato tokante un persona natural identifiká òf identifikabel ta dato personal, ke men, sea un informashon ku ta direktamente tokante un hende òf unu ku bo por konektá ku un hende. Ya ku e lei ta papia di persona natural, dato di hende ku a fayesé i dato di organisashon no ta dato personal.

Ehèmpel di dato personal

Tin hopi sorto di dato personal. Algun dato típiko ku ta kai bou di e kategoria akí ta un hende su nòmber, adrès i lugá di biba. Pero number di telefòn i number di outo tambe ta dato personal. Tin bes, sa usa e término ‘dato personal spesial’ pa referí na dato delikado, manera hende su rasa, religion i kondishon di salú. Legisladó ta duna e tipo di datonan akí èkstra protekshon.

Protekshon di dato personal

Protekshon di privasidat ta un derecho fundamental. E derecho akí ta reglá den:

  • artíkulo 10 insiso 1 di Konstitushon;
  • artíkulo 8 di Kombenio Europeo pa Protekshon di Derecho Humano i e Libertatnan Fundamental (KEDH);
  • artíkulo 17 di Kombenio Europeo pa Protekshon di Derecho Humano i e Libertatnan Fundamental (KEDH) i den artíkulo 17 di Kombenio Internashonal tokante Derecho Sivil i Polítiko (KIDSP).

E tres artíkulonan akí ta indiká ku mester tin un lei pa protekshon di dato personal, di manera ku tur hende su derecho di privasidat por ta garantisá. Aktualmente na Hulanda Karibense, e lei ei ta Wbp BES. Promé ku introdukshon di Wbp BES, no tabatin un reglamentashon general na Boneiru, Sint-Eustatius i Saba riba tereno di prosesamentu di dato personal. Algun tratado internashonal sí tabata ofresé protekshon di e derecho di privasidat.

Kiko prosesamentu di dato personal ta enserá?

Prosesamentu ta enserá tur loke un organisashon por hasi ku dato personal, for di rekolektá nan te destruí nan.
Ku otro palabra, e término akí ta basta amplio. E akshonnan ku en todo kaso ta kai bou di prosesamentu segun Lei di protekshon di dato personal BES (Wbp BES) ta: rekolektá, registrá, ordená, warda, aktualisá, modifiká, aksesá, konsultá, usa, suministrá, plama, hasi disponibel, kombiná, konektá ku otro, kita, destruí i blòkia akseso na dato.

Kiko ta loke Lei di protekshon di dato personal BES ta regla?

Lei di protekshon di dato personal BES (Wbp BES) ta regla kiko tin mag i no tin mag di hasi ku dato personal di hende, i ki derecho di privasidat un hende tin ora ku un organisashon ta prosesá su datonan. Por ehèmpel, e tin derecho di risibí informashon tokante kon e organisashon ta usa su datonan, i derecho di pidi pa wak su datonan i pidi pa koregí esakinan.

Wbp BES ta stipulá ku un organisashon tin mag di prosesá dato personal solamente ora ta nesesario pa un meta spesífiko i ku e organisashon no tin mag di usa e datonan pa un otro meta sin mas. Ademas, e organisashon tin deber di protegé e datonan bon.

Kada bes ku usa dato personal, tin ku sòru pa limitá e violashon di hende su privasidat mas tantu posibel. No ta tur prosesamentu di dato personal mester enserá un violashon di privasidat sí. Esei ta dependé di e tipo di dato i kon e organisashon ta usa nan.

Kiko ta kai bou di dato personal spesial?

Dato personal spesial ta dato tokante un hende su:

  • religion òf filosofia di bida;
  • rasa;
  • preferensia polítiko;
  • salú;
  • bida seksual;
  • membresia di sindikato;
  • pasado penal.

Un organisashon no tin mag di usa dato personal spesial, a ménos ku ta a base di un eksepshon fihá den lei.

Ken ta e ‘responsabel’ i ken ta e ‘persona konserní’ den prosesamentu di dato personal?

E responsabel ta e persona òf organisashon ku ta disidí ku ki meta ta usa e datonan personal i ki medio ta usa pa prosesá nan. E responsabel por hasi esaki solamente den kooperashon ku otro hende. Esei ke men ku, na final di kuenta, e responsabel ta esun ku ta disidí si un organisashon ta prosesá dato personal, i si ta asina:

  • ki sorto di prosesamentu lo usa;
  • kua ta e datonan personal ku e organisashon ta bai prosesá;
  • ku ki meta e organisashon ta bai hasié;
  • kon e organisashon ta bai hasié.

E persona konserní ta esun ku e organisashon ta prosesá su datonan personal, ku otro palabra, esun ku e datonan personal tin di aber kuné.

Ken ta e prosesadó ora ta prosesá dato personal?

Un prosesadó ta un persona òf organisashon ku e responsabel ta laga prosesá e datonan. Por ehèmpel, un ofisina di atministrashon.
Un prosesadó no ta responsabel independientemente pa e prosesamentu di dato personal. Pero e prosesadó tin sierto deber sí komo tal, por ehèmpel di protegé e datonan i mantené nan sekreto .