Vigilansia di empleado

Un doño di trabou tin diferente manera pa rekolektá tur tipo di informashon tokante su empleadonan outomátikamente, por ehèmpel vigilansia ku kámara, sentral di telefòn, porta di siguridat i sistema di kòmpiuter. E por usa e informashon akí pa diferente meta, entre otro pa kontrolá su empleadonan.

Vigilansia di empleado no ta prohibí. Pero e doño di trabou tin ku tene kuenta sí ku privasidat di su empleadonan. P’esei, un doño di trabou no tin mag di vigilá delaster un kos ku su empleadonan ta hasi henter dia.

Ta permití vigilansia di empleado si esei sosodé de bes en kuando i si e doño di trabou ta kumpli ku e kondishonnan fihá den Lei di protekshon di dato personal BES. Si e kontrol ta sekreto, esta, si e ta sosodé sin ku e empleadonan sa, tin regla adishonal.

 

Kua ta e kondishonnan pa vigilansia di empleado?

Un doño di trabou ku ke vigilá su empleadonan tin ku kumpli, entre otro, ku e eksigensianan fihá den Lei di protekshon di dato personal BES (Wbp BES). E kondishonnan di mas importante relashoná ku vigilansia di empleado ta:

  • E doño di trabou mester tin un motibu legítimo (un asina yamá ‘interes hustifiká’). E interes akí mester pisa mas ku e empleadonan su interes di privasidat.
  • No por tin otro manera pa logra e meta ku ménos violashon di privasidat di e empleadonan.
  • E doño di trabou mester informá e empleadonan kiko tin mag i kiko nò, ku nan lo por ser vigilá i kon esei ta tuma lugá. Por hasi esaki por ehèmpel pa medio di regla di kondukta òf un protokòl.
  • E doño di trabou mester tene kuenta ku e empleadonan su derecho di komuniká ku otro hende na un manera konfidensial, entre otro ora e ta kontrolá nan uso di e-mail òf telefòn.

Kua ta e kondishonnan pa vigilansia sekreto di empleado?

Pa vigilansia sekreto di empleado, e siguiente reglanan èkstra ta konta, banda di esunnan pa vigilansia ‘normal’:

  • E doño di trabou mester tin un sospecho rasonabel ku un òf mas di su empleadonan ta hasi algu ku ta kastigabel òf prohibí.
  • Semper e doño di trabou tin ku informá e empleadonan en kuestion despues tokante e vigilansia sekreto, asta si e vigilansia no a duna indikashon ku e sospecho tabata na lugá.

Mi doño di trabou tin mag di vigilá mi uso di e-mail i internèt?

Sí, esei tin mag. Bo doño di trabou tin mag di fiha kondishon tokante uso di e-mail i internèt na trabou, òf prohibí sierto tipo di uso di e-mail i internèt. Despues di esei, bo doño di trabou tin mag di tira kontrol. Sinembargo, ora e hasi esei, bo doño di trabou tin ku kumpli ku e kondishonnan fihá, entre otro, den Lei di protekshon di dato personal BES relashoná ku vigilansia di empleado.

Vigilansia general
Por ehèmpel, bo doño di trabou lo por chèk, stail di sondeo, si su empleadonan ta usando e-mail òf internèt na un manera prohibí, por ehèmpel pa bishitá wèpsait di porno òf pa download muzik i pelíkula.

Vigilansia sekreto
Si bo doño di trabou tin sospecho ku un òf mas empleado ta usa e-mail òf internèt na un manera prohibí, bou di sierto kondishon e tin mag di tira kontrol spesífiko di e manera ku e empleado(nan) spesífiko ei ta usa e-mail i internèt. Pa un vigilansia sekreto di e tipo ei, esta, sin ku e empleadonan en kuestion sa di dje di antemano, tin kondishon èkstra.

Meta di e vigilansia
Promé ku bo doño di trabou kuminsá tira kontrol, e tin ku fiha e meta pa kua e kontrol ta nesesario. E meta di e kontrol ta determiná kon amplio e kontrol tin mag di ta i kon e tin mag di tuma lugá. Un meta por ta, por ehèmpel: siguridat di sistema i ret di kòmpiuter, protekshon di sekreto di negoshi òf redukshon di gastu i pèrdida di tempu.

Den hopi kaso, ta sufisiente si bo doño di trabou tira kontrol durante un periodo kòrtiku i na un manera dirigí si e ta sospechá uso di e-mail òf internèt na un manera prohi

Kua ta e reglanan general di kondukta ku ta konta pa e-mail i internèt na trabou?

Si bo doño di trabou no tin regla di kondukta ni un protokòl tokante uso di e-mail i internèt na trabou, e siguiente reglanan general ta konta.

Bo doño di trabou no tin mag di prohibí uso privá di e-mail i internèt kompletamente bou di ora di trabou, pasobra bo tin derecho riba un grado di privasidat na trabou.

Pero bo mester usa nan na midí sí. Tambe bo tin ku tene kuenta ku kontenido di bo e-mail i di e wèpsaitnan ku bo ta bishitá, ya ku wakmentu di porno bou di ora di trabou, por ehèmpel, no ta permití.

Mi doño di trabou tin mag di vigilá kiko mi ta hasi riba wèpsait di medio sosial?

Sí, esei tin mag. Bo doño di trabou por, entre otro, buska riba nòmber di e organisashon pa chèk de bes en kuando kiko tin bisá tokante su organisashon riba e medionan sosial. Sinembargo, ora e hasi esei, bo doño di trabou tin ku kumpli sí ku e kondishonnan, fihá entre otro den Lei di protekshon di dato personal BES tokante vigilansia di empleado.

Paga tinu: Bo doño di trabou tin mag di kontrolá solamente informashon públiko ku ta aparesé riba medio sosial. Bo doño di trabou no por obligá bo di ‘friend’ e riba, por ehèmpel, Facebook, ni obligá bo dun’é password di bo kuenta.

Norma pa vigilansia di medio sosial
Bo doño di trabou tin ku laga su empleadonan sa di antemano ku lo por vigilá nan. Ta konsehabel pa bo doño di trabou formulá norma interno tokante esei, similar na e normanan tokante vigilansia di uso di e-mail i internèt di e empleadonan

Mi doño di trabou tin mag di lesa mi e-mail ora mi no t’ei?

Sí, e tin mag di lesa bo e-mail di trabou. Bo mes por distinguí bo e-mailnan di trabou for di e-mail privá. Bo por hasi esei poniendo bo e-mail privá den un folder apart (ku por ehèmpel bo por yama ‘Privá’), òf bo por skirbi e palabra ‘privá’ den título di tur bo mailnan privá.

Si título di un mensahe ta indiká ku e ta un e-mail privá, bo doño di trabou no tin mag di les’é. Si bo no separá bo mensahenan di trabou for di esunnan privá, tòg bo doño di trabou tin ku tene kuenta ku su empleadonan ta risibí i manda mensahe privá. Ora bo doño di trabou ta lesa bo mail, te asina leu ku ta posibel e tin ku keda sin lesa bo mensahenan privá.

Reglamento tokante chèkmentu di e-mail
Ta konsehabel pa bo doño di trabou duna di konosé, via un reglamento, ku otro hende lo por chèk bo e-mail di trabou durante bo fakansi òf ora bo ta AO. Asina, bo por sa di antemano ku bo doño di trabou lo por lesa bo e-mail.

Mi doño di trabou tin mag di vigilá kon mi ta usa telefòn?

Si bo doño di trabou tin indikashon ku un òf mas empleado ta usa telefòn na trabou, òf di trabou, na un manera inkorekto, e tin mag di vigilá bo uso di telefòn. Pero e tin ku kumpli sí ku e kondishonnan fihá, entre otro, den Lei di protekshon di dato personal BES tokante vigilansia di empleado.

Komo empleado, bo tin derecho di usa bo telefòn di trabou de bes en kuando pa un yamada privá. Esei ke men ku bo doño di trabou no por reprochá bo debí ku bo a usa bo telefòn di trabou pa yamada privá insidentalmente. Pero bo doño di trabou tin derecho di tene e gastunan na bista sí.
Bo doño di trabou tin mag di risibí un lista mensual di tur e yamadanan ku a sali mas karu, basta e lista no menshoná niun nòmber. Despues, stail di sondeo, bo doño di trabou por saka afó kua ta e empleadonan responsabel pa algun di e yamadanan akí, i pidi nan splikashon al respekto.

Evitá yamada kostoso
Tambe, bo doño di trabou tin mag di purba evitá yamada kostoso, entre otro blòkiando yamada pa number internashonal. Si esei mes yuda baha e gastunan, probablemente no ta nesesario pa bo doño di trabou sigui vigilá gastu di yamada di telefòn di empleado individual.

Mi doño di trabou tin mag di kontrolá kon mi ta usa mi selular di trabou?

Si bo ta usa un selular di bo doño di trabou pa hasi yamada i e palabrashon ta ku bo no tin mag di usa e telefòn pa yamada privá, bo doño di trabou tin mag di kontrolá bo komportashon di yamada si tin un sospecho rasonabel ku bo ta aktuando kontra regla. Por ehèmpel, e lo por pidi un lista detayá di e yamadanan hasí for di e telefòn ei.

Si no tin palabrashon tokante uso di bo selular pa yamada privá, bo tin derecho di hasi un yamada privá de bes en kuando. Pero bo doño di trabou tin derecho di tene e gastunan na bista sí.

Mi doño di trabou tin mag di graba mi yamadanan di telefòn?

Bo doño di trabou tin mag di graba bo yamadanan di telefòn solamente si ta nesesario, i si bo doño di trabou ta kumpli ku e kondishonnan fihá, entre otro, den Lei di protekshon di dato personal BES.

Un doño di trabou tin mag di graba yamada di telefòn entre otro pa:

  • mehorá e servisio ku su empleadonan ta brinda via telefòn den un call center;
  • proba un sospecho di froude di parti di un empleado;
  • kontrolá si un keho di un kliente tin base.

Informashon tokante grabamentu di yamada
Bo doño di trabou tin ku informá bo inmediatamente ku e ta grabando bo yamada. Por ehèmpel, e por laga un señal zona na kuminsamentu di e grabashon i splika e empleadonan di antemano ku e señal ei ta indiká ku ta bai kuminsá graba e yamada. Ku otro palabra, no ta sufisiente si bo doño di trabou informá bo un biaha so, ora bo drenta den servisio, ku lo por graba bo yamadanan.

Bo doño di trabou tin ku informá e persona ku bo ta papiando kuné tambe ku ta bai graba e yamada i ku ki meta ta bai usa grabashon di e yamada, por ehèmpel pa preparashon di e empleadonan.

Mi doño di trabou tin mag di graba mi yamadanan di telefòn den sekreto?

Bo doño di trabou tin mag di graba yamada den sekreto solamente den kaso eksepshonal. E kasonan akí ta: menasa, ‘bommelding’ òf den kaso ku e ta sospechá komportashon kastigabel di bo parti, por ehèmpel, divulgashon di sekreto di negoshi. Den kaso asina, bo doño di trabou tin ku kumpli ku e kondishonnan fihá, entre otro, den Lei di protekshon di dato personal BES tokante vigilansia sekreto di empleado.

Ademas, bo doño di trabou tin ku tuma sufisiente medida di garantia relashoná ku e grabashonnan sekreto. Por ehèmpel, e lo por sòru pa solamente persona outorisá tin akseso na e grabashonnan, i laga destruí e grabashonnan outomátikamente si resultá ku bo no a kometé nada kastigabel.

Ademas, bo doño di trabou no tin mag di warda e grabashonnan mas tempu ku ta nesesario, i preferibel no mas ku seis luna.

Mi doño di trabou tin mag di graba mi yamadanan di telefòn kontinuamente?

Grabashon kontinuo di yamada di telefòn ta nesesario pa sierto tipo di servisio, manera kompra i benta telefóniko di balor riba bolsa. Den kaso asina, un grabashon ta nesesario komo prueba di e echo ku a sera un akuerdo. Bo doño di trabou no por optené e prueba ei niun otro manera i p’esei den un kaso asina e tin mag di graba bo yamadanan riba base kontinuo.

Bo doño di trabou tin mag di usa e grabashonnan di bo yamadanan solamente komo prueba di e akuerdo será; ku otro palabra, no pa otro meta, por ehèmpel pa duna bo guia òf pa evaluá bo komo empleado.

Mi doño di trabou tin mag di vigilá mi ku kámara (skondí)?

Bou di sierto kondishon, bo doño di trabou tin mag di usa vigilansia ku kámara pa vigilá empleado. Normalmente no tin mag di usa kámara skondí, pero si tin hopi ladronisia òf froude na trabou, bo doño di trabou tin mag di usa un kámara skondí, bou di kondishon estrikto, pa vigilá su empleadonan. Bo por haña mas informashon na Vigilansia ku kámara na trabou

Mi doño di trabou tin mag di pone un sistema di tracking den mi outo?

Sí, esei tin mag si bo doño di trabou kumpli ku e kondishonnan fihá, entre otro, den Lei di protekshon di dato personal BES tokante vigilansia di empleado. E kondishon prinsipal ta ku bo doño di trabou mester tin un motibu legítimo (interes hustifiká), i ku instalashon di un sistema di tracking, por ehèmpel un ‘black box’, ‘board kòmpiuter’ òf sistema di gps ta nesesario.

Un interes hustifiká ku bo doño di trabou por tin pa hasi esaki ta, por ehèmpel, ku e ke sa kua outo ta mas serka den besindario di un kliente pa e manda e outo ei serka e kliente.

Evaluashon di privasidat
Promé ku bo doño di trabou instalá un sistema di ‘tracking’ den bo outo, e tin ku hasi un evaluashon di privasidat. Esei ta enserá ku bo doño di trabou tin ku pisa bo interes- i derechonan kontra su propio interes.

Ademas, bo doño di trabou tin ku informá bo di antemano ku ki meta e sistema di ‘tracking’ ta rekolektá dato, ki ora esei ta sosodé i ki dato e ta rekolektá.

Vigilansia di uso privá
Ora ta trata di vigilansia di loke ta sosodé den bo tempu liber, mayoria di bes bo interesnan ta pisa mas ku interes di bo doño di trabou. Na mayoria di empresa, por paga e black box, board kòmpiuter òf sistema di gps den tempu liber.

Mi tin deber di duna mi doño di trabou mi marka di deder?

Bo doño di trabou por usa un sistema di akseso i registrashon di tempu ku ta traha a base di bo marka di dede. Den un kaso asina, bo tin deber di duna bo marka di dede.

Mayoria di e tipo di sistema biométriko akí no ta warda bo marka di dede mes, sino solamente un kódigo protegé via un sistema kriptológiko. Ku e kódigo akí, bo doño di trabou por kontrolá si ta bo mes. No por usa e kódigo pa desifrá kon bo marka di dede ta. Lei ta eksigí sí pa bo doño di trabou protegé un sistema asina debidamente.

Paga tinu: Bo doño di trabou tin mag di usa bo marka di dede solamente pa kontrol di akseso òf registrashon di tempu; pa nada otro.

Kiko ta un sistema di vigilansia di personal?

Un sistema di vigilansia di personal por ta kualke sistema outomatisá ku por sirbi pa vigilá empleado. Si un doño di trabou ta usa un sistema pa otro kos, esta, no pa vigilá su empleadonan, pero e posibilidat di vigilá nan t’ei sí, tambe por konsiderá e sistema ei un sistema di vigilansia di personal. P’esei mes, tin sistema di vigilansia di personal den hopi organisashon.

Algun ehèmpel di sistema di vigilansia di personal ta:

  • vigilansia (sekreto) ku kámara;
  • sentral di telefòn;
  • black box, board kòmpiuter òf sistema di gps;
  • software (filter) pa vigilá uso di e-mail i internèt;
  • ‘prikklok’ i otro sistema di kontrol di akseso;
  • bèch òf ‘chipcard’ pa monitoreo di akseso, presensia, moveshon i/òf pago.

Mi tin mag di wak e datonan personal ku mi doño di trabou tin di mi i/òf laga koregí òf eliminá nan?

Si, bo por. Bo tin derecho di wak e datonan ku bo doño di trabou tin di bo. Tambe bo por pidi pa koregí òf eliminá nan.

Unda mi por akudí si mi tin un keho tokante vigilansia di empleado?

Akudí promé na bo doño di trabou mes. Si bo doño di trabou no reakshoná òf si bo no ta satisfecho ku su reakshon, bo por presentá bo keho na bo sindikato

Bai korte
Bo por bai korte tambe. Den korte bo por apelá na e derechonan ku bo tin a base di Lei di protekshon di dato personal BES. Bo por pidi hues, por ehèmpel, pa e prohibí prosesamentu di bo datonan personal, reparashon di e konsekuensianan (negativo) òf pago di daño i per