Screening

Pa un dunadó di trabou, ta importante pa e empleadonan ku e tuma den servisio ta konfiabel. Un screening ta un medio pa limitá e riesgonan enbolbí. Pa sierto funshon, lei ta asta eksigí un screening.

Screening ta enserá ku un doño di trabou ta pidi informashon tokante un solisitante òf empleado pa asina e por tin un idea di su integridat. Pa hasi esei, por ehèmpel e por bèl e personanan ku e solisitante a menshoná komo referensia.
Un screening por tin un impakto grandi riba privasidat di e solisitante òf empleado en kuestion. P’esei, ta bou di sierto kondishon so lei ta permití pa un screening tuma lugá. E kondishonnan prinsipal ta ku e doño di trabou mester tin un motibu legítimo (interes hustifiká) i ku e screening mester ta nesesario.

Interes hustifiká
Den mayoria di kaso, e interes hustifiká di e doño di trabou pa hasi un screening ta ku e mester por konta ku su personal (futuro) ta íntegro i konfiabel.

Nesesidat
Esei ta enserá entre otro ku e doño di trabou no por logra su meta via otro medio ménos drástiko ku un screening.

Demas kondishon pa screening
Ora un doño di trabou hasi un screening, e ta prosesando dato personal di e solisitante òf empleado. Esei ta nifiká ku e doño di trabou tin ku kumpli ku Lei di protekshon di dato personal BES.

Mi (futuro) doño di trabou tin mag di screen mi?

Ora bo solisitá serka un doño di trabou, e por (laga) hasi un screening. Una bes ku bo ta den servisio kaba, bo doño di trabou tin mag di screen bo si ta nesesario si naturalesa di bo funshon ta eksigí esei, por ehèmpel si bo ta traha ku polis. Un doño di trabou tin mag di screen bo solamente si e ta kumpli ku sierto kondishon. Pa algun funshon, lei ta eksigí un screening.
Un dunadó di trabou mester por sa si e empleadonan ku e ke tuma den servisio ta konfiabel. P’esei, e doño di trabou ku bo solisitá serka dje por disidí di screen bo. Esei ta enserá ku e doño di trabou ta buska mas informashon tokante bo.

Mayoria di bes, un screening ta enserá ku e doño di trabou ta verifiká e datonan ku ta aparesé den bo curriculum vitae. E por hasi esei dor di bèl e personanan ku bo a menshoná komo referensia, òf dor di ‘google’ bo.

Kondishon pa screening
E kondishonnan prinsipal pa por hasi un screening ta:

  • E doño di trabou tin mag di buska solamente informashon tokante bo ku ta relevante pa e funshon ku bo ta solisitá p’e. Si bo a solisitá pa un funshon den kua bo tin ku atendé ku suma grandi di plaka òf ku informashon konfidensial riba un base regular, e ora ei bo doño di trabou tin mag di buska mas informashon tokante bo, kompará ku un funshon pa kua esei no ta e kaso.
  • En prinsipio no tin mag di screen bo tokante bo salú, a ménos ku tin eksigensia spesial pa e funshon, i ku p’esei, por ehèmpel, bo tin ku hasi un tèst di bista.
  • E doño di trabou tin ku informá bo tokante e screening. E tin ku bisa bo di antemano ku un screening ta bai tuma lugá, i despues laga bo sa e resultadonan.

Deklarashon di kondukta
Pa algun funshon, e doño di trabou tin mag di pidi bo un asina yamá deklarashon di kondukta (na hulandes, VOG). Na momento ku gezaghebber emití un VOG pa bo, esei ta enserá ku a base di e investigashon ku a laga hasi, i en bista di e meta pa kua a pidi e deklarashon, e no a topa niun opheshon kontra e persona konserní.
E reglanan pa petishon i emishon di VOG na e islanan BES ta fihá den Lei di dokumentashon hudisial i deklarashon di kondukta BES (Wet op de justitiële documentatie en op de verklaringen omtrent het gedrag BES).

Mester screen mi di nobo kada bes ku mi doño di trabou ‘detacheer’ mi?

Nò, den mayoria di kaso no ta nesesario pa nan bolbe screen bo kada bes ku bo doño di trabou ‘detacheer’ bo pa bo bai traha den un otro organisashon, a ménos ku tin eksigensia (di siguridat) spesial ta konta pa e trabou den e otro organisashon. Den un kaso asina sí nan tin mag di screen bo di nobo.

Detachering
Bo por ta den servisio di un doño di trabou i sinembargo traha pa otro organisashon.
Por ehèmpel:

  • Bo ta traha na un kompania di limpiesa ku ta manda bo bai hasi trabou di limpiesa serka un òf mas kliente.
  • Komo mekániko, bo ta den servisio di un kompania ku ta laga bo hasi trabou di mantenshon na otro empresa.
  • Bo ta den servisio di un ‘detacheringsbureau’ ku ta manda bo bai traha den un otro organisashon kada bes.

E otro organisashonnan akí por pidi bo pasa un screening promé ku bo bin traha pa nan. Pero si pa kada kliente bo mester bolbe pasa un screening, esei lo ta un violashon serio di bo privasidat.

Un solo screening
P’esei, ta konsehabel pa bo doño di trabou hasi un solo screening (a ménos ku lei ta eksigí otro kos). Un kliente lo por puntra bo doño di trabou kua ta e métodonan di screening ku el a usa i si a base di nan el a topa kualke opheshon.
Bo a haña bo deklarashon di kondukta (VOG)? Si ta asina, den kaso ku e kliente tin duda, e por pidi bo pa lag’é wak esei.

Kua ta e eksigensianan ku Lei di protekshon di dato personal BES ta stipulá pa screening?

Si bo screen un solisitante òf empleado, bo ta prosesando su datonan personal. Esei ta nifiká ku bo tin ku kumpli ku Lei di protekshon di dato personal BES (Wbp BES). Komo doño di trabou, ta bo responsabilidat pa e screening sosodé kompletamente di akuerdo ku e eksigensianan di Wbp BES.

Wbp BES ta fiha, en todo kaso, e siguiente eksigensianan relashoná ku screening:

  • Bo mester tin un interes hustifiká pa hasi e screening.
  • E screening mester ta nesesario. Ku otro palabra, mester ta asina ku bo no por logra bo meta otro manera, usando un medio ménos drástiko ku screening.
  • Bo tin ku kumpli ku e deber di notifikashon. Esei ke men ku bo tin ku bisa e solisitante òf empleado en kuestion di antemano ku bo ta bai hasi un screening, i despues di e screening lag’é sa e resultado.
  • Bo no tin mag di usa e datonan ku bo a optené di e screening pa un otro meta.
  • Bo tin mag di warda e datonan solamente tanten ku esei ta nesesario pa meta di e screening.
  • E datonan mester ta sufisiente, nan mester ta relevante i bo no tin mag di rekolektá mas dato ku loke ta nesesario.
  • Bo tin ku protegé e datonan bon.

Komo doño di trabou, kon mi por determiná si un screening ta nesesario?
Bo tin ku inventarisá e riesgonan mará na e diferente gruponan di funshon denter di bo organisashon. Despues, bo tin ku wak si no tin otro manera di limitá e riesgonan ei ku no ta mediante un screening.

Inventarisashon di riesgo
Pa kada grupo di funshon, bo tin ku identifiká e eksigensianan di funshon i e riesgonan spesífiko korespondiente. Pa un funshon kaminda e personal ta traha ku informashon konfidensial, por ehèmpel, e riesgo ta ku e empleadonan lo por bende òf duna otro hende e informashon. Funshon finansiero konosé, entre otro, e riesgo di froude, ladronisia, malversashon òf soborno.

Limitashon di riesgo
Ora bo kaba di inventarisá e riesgonan, bo tin ku regla tur asuntu den bo organisashon di tal manera ku bo ta redusí e riesgonan inventarisá, por ehèmpel mediante un kontrol interno skèrpi i repartishon di outoridat.

Bon medida organisatorio lo por eliminá e riesgonan di bo organisashon kompletamente. Si esei no ta e kaso, anto podisé screening di solisitante òf empleado ta nesesario

Si un hende mes duna outorisashon pa screen e, e ora ei sí tin mag. Òf nò?

Nò, outorisashon di solisitante i empleado no ta bálido pa lei. Asta si bo haña outorisashon, ainda tin vários kondishon (fihá den lei) ku lo bo tin ku kumpli kuné.
No por screen un (futuro) empleado a base di su mes outorisashon, pasobra lei ta eksigí pa e persona duna su outorisashon na un manera kompletamente boluntario pa e ta bálido.

Un solisitante òf empleado ta dependiente di bo komo su (futuro) doño di trabou. Debí ku e ta den un posishon di dependensia, e por sintié preshoná pa duna bo su outorisashon. Debí na esei, no por bisa ku e outorisashon ta duná na un manera boluntario

Komo doño di trabou, mi tin mag di screen un hende sin bis’e?

Nò, esei no tin mag. Bo tin deber di pone e solisitante òf empleado ku bo ta screen na altura di e screening.

Informashon promé ku e screening
Bo tin ku pone e solisitante òf empleado en kuestion na altura di antemano ku lo tin un screening, indikando tambe pakiko un screening ta nesesario. Tambe bo tin ku lag’é sa ki ta e datonan ku bo ta buska i pakiko nan ta relevante pa e funshon en kuestion.

Informashon despues di e screening
Despues di e screening, bo tin ku informá e solisitante òf empleado en kuestion tokante e resultadonan di e screening.

Ki ta e datonan ku komo doño di trabou mi tin mag di pidi den un screening?

Bo tin mag di pidi solamente e datonan ku ta nesesario pa limitá mas tantu posibel e riesgonan ku ta mará na un sierto funshon.

No tin mag di usa e mesun screening pa tur funshon den bo empresa òf organisashon. E screening tin mag di ta relashoná solamente ku e riesgonan spesífiko ku ta mará na un sierto funshon. Por ehèmpel, no ta den tur kaso un kontrol di e persona su situashon di krédito ta nesesario. Probablemente, esei ta nesesario solamente pa sierto funshon ku tin di aber ku plaka òf finansa.

Recente gegevens

Dato resien
E periodo di tempu ku ta investigá den kuadro di e screening mester ta mas limitá posibel. Kasi nunka no ta nesesario pa buska dato di 20 aña promé, pasobra e datonan ei lo no ta relevante mas pa e situashon aktual.

Esei ke men ku bo tin ku pensa bon kua ta e datonan tokante bo solisitante òf empleado su pasado ku ta nesesario ainda pa por evalu’é na un manera adekuá. Ta e datonan ei so tin mag di ta parti di e screening.

Dato médiko
En prinsipio, no tin mag di screen un solisitante òf empleado tokante su salú, a ménos ku tin eksigensia spesial pa e funshon i ku p’esei un evaluashon médiko ta nesesario.

Dato penal
Pa sierto funshon, por ta nesesario pa bo ta na altura di un solisitante òf empleado su pasado penal.

Komo doño di trabou, mi tin mag di pidi dato penal den kuadro di un screening?

Pa sierto funshon, por ta nesesario pa bo ta na altura di un solisitante òf empleado su pasado penal. Den mayoria di kaso, si bo laga e persona en kuestion pidi un deklarashon di kondukta (VOG), esei mes ta sufisiente.

VOG
Un VOG ta un deklarashon ku ta mustra ku un hende su komportashon (penal) den pasado no ta forma un opheshon pa e meta pa kua a pidi e VOG.

Screening di dato penal
Ta solamente den kaso ku un VOG no ta basta, bo por pidi tur e persona su datonan penal. Pero e datonan akí ta ‘dato personal spesial’, i en prinsipio lei ta prohibí pa prosesá nan. Ta solamente si bo por apelá na un eksepshon tokante e prohibishon di prosesamentu, lo bo tin mag di pidi dato penal den kuadro di un screening. Esaki ta konta pa funshon ku ta eksigí mas informashon debí na karakter di e tareanan enbolbí.

Komo doño di trabou, podisé bo por apelá na e eksepshon ku tin den artíkulo 22 insiso 2a di Lei di protekshon di dato personal BES. E eksepshon akí ta enserá ku bo por prosesá un hende su datonan penal pa, riba su mes petishon, tuma un desishon tokante su persona òf hasi algu p’e. Pues, bo ta pidi e datonan penal pa tuma e persona den servisio òf pa transfirié, pasobra e mes a pidi bo, pa un otro funshon.

Komo doño di trabou, mi tin mag di laga un otro hende òf organisashon hasi un screening pa m?

Sí, esei tin mag. Por ehèmpel, bo por laga un empresa spesialisá den screening hasié. Pero kòrda ku ta abo ta keda responsabel pa e screening kumpli ku tur eksigensia di lei.
P’esei, promé ku bo pidi un empresa asina hasi un screening, bo tin ku kumpli ku tur eksigensia fihá den Lei di protekshon di dato personal BES tokante screening.