Solisitut

Durante un solisitut, e doño di trabou ta rekolektá hopi dato personal di e solisitantenan, pa kuminsá, di nan karta di solisitut i cv. Esnan presente na un kòmbersashon di solisitut por hasi anotashon di e kontestanan ku e solisitante ta duna, kiko a bini padilanti den e kòmbersashon i ki impreshon nan a haña di e solisitante. Finalmente, un screening, evaluashon, tèst sikológiko òf saminashon médiko (aanstellingskeuring) tambe por forma parti di e prosedimentu di solisitut.

Plaso pa warda dato di solisitut
Si un solisitante no a haña e trabou, normalmente e organisashon ta eliminá su datonan pa mas tardá kuater siman despues ku e prosedimentu di solisitut a terminá.
Un solisitante por duna outorisashon pa nan warda su datonan mas tempu, por ehèmpel, por si akaso bin un vakatura nobo ku ta pas p’e. Den un kaso asina, un plaso rasonabel ta no mas ku un (1) aña despues ku e prosedimentu di solisitut terminá.

Mi tin ku bisa algu tokante mi salú durante e kòmbersashon di solisitut?

Bo tin ku hasié si esei ta direktamente relevante pa e funshon ku bo ta solisitando p’e, por ehèmpel, si tin sierto parti importante di e funshon ku lo bo no por kumpli kuné debí na un malesa òf desabilidat. Tur otro informashon tokante bo salú, bo tin mag di mantené sekreto.

Si bo bira inkapas pa traha debí na un malesa òf desabilidat ku bo a keda sin menshoná durante bo solisitut, esei por tin konsekuensia pa bo derecho di risibí pago durante bo periodo di inkapasidat laboral. Bo doño di trabou lo por kita bo for di trabou inmediatamente tambe.

Durante e kòmbersashon di solisitut, mi tin ku bisa si mi ta na estado òf si mi ke sali na estadon?

Nò, bo no tin deber di hasi esei. Si nan puntra bo si bo ta na estado òf ku bo tin intenshon di sali na estado, bo no tin nodi di papia bèrdat ora bo kontestá e pregunta ei.

Si bo mes ke menshoná ku bo ta òf tin intenshon di sali na estado, bo por hasi esei. Un doño di trabou no tin mag di rechasá bo solisitut pasobra bo ta òf ke sali na estado

Un doño di trabou tin mag di buska informashon tokante mi riba internèt si mi solisitá serka dje?

En prinsipio esei no ta prohibí. Tene kuenta ku e datonan ku tin tokante bo riba internèt ta dato públiko. Pero e doño di trabou tin ku realisá si ku no ta tur informashon riba internèt ta bèrdat.Si e doño di trabou usa dato di internèt durante e prosedimentu di solisitut, anto e tin ku duna bo un chèns di splika un ke otro tokante e informashon ku el a haña.

Blòkia perfil
Si bo no ke pa bo futuro doño di trabou wak bo perfil(nan) riba página di medio sosial, bo por blòkia nan pa hende ku bo no konosé. Bo por hasi esei ku bo ‘privacy settings’.

Un doño di trabou tin mag di screen mi ora mi solisitá?

E tin mag solamente si e ta kumpli ku sierto kondishon (fihá den lei). E kondishonnan ei t’ei pa protegé bo privasidat. Pa algun funshon, lei ta eksigí screening, por ehèmpel pa kuida mucha.

Screening pa solisitut
Pa un dunadó di trabou, ta importante pa sa si e empleadonan ku e ta kontratá ta konfiabel. P’esei, e doño di trabou ku bo solisitá serka dje por disidí di screen bo. Esei ta enserá ku e doño di trabou ta bai buska mas informashon tokante bo.

Mayoria di bes, un screening ta enserá ku e doño di trabou ta verifiká e datonan riba bo curriculum vitae. E por hasi esei dor di bèl e personanan ku bo a menshoná komo referensia òf dor di ‘google’ bo.

Kondishon pa screening
E kondishonnan prinsipal pa por hasi un screening ta:

  • E doño di trabou tin mag di buska solamente informashon tokante bo ku ta relevante pa e funshon ku bo ta solisitá p’e. Si bo solisitá, por ehèmpel, pa un trabou di atministrashon, un screening ekstenso no ta nesesario. Pero si ta pa un funshon den kua riba un base regular bo tin ku atendé ku suma grandi di plaka òf ku informashon konfidensial, e ora ei sí bo doño di trabou tin mag di buska mas informashon tokante bo.
  • Nunka e no tin mag di screen bo tokante bo salú, a ménos ku lei ta eksigí un saminashon médiko pa e funshon ku bo ta solisitá p’e.
  • E doño di trabou tin ku informá bo tokante e screening. E tin ku bisa bo di antemano ku un screening ta bai tuma lugá, i despues laga bo sa e resultadonan.

Screening eksigí pa lei

Den kaso di un screening eksigí pa lei, e doño di trabou tin mag di pidi un asina yamá Deklarashon di Kondukta (Verklaring Omtrent het Gedrag, òf VOG).

Ademas, den lei tin sierto stipulashon spesial tokante screening pa funshon di konfiansa manera ámtenar di polis i algun funshon den gobièrnu.

Mas informashon tokante screening wak Screening pa mas informashon tokante e eksigensianan ku un dunadó di trabou tin ku kumpli kuné ora di screen solisitante òf empleado.

Mi tin mag di wak òf laga nan koregí òf kita mi datonan di solisitut?

Sí, bo tin derecho di wak bo datonan di solisitut. Tambe bo por pidi pa nan koregí òf kita esakinan.

Unda mi por akudí si mi tin un keho tokante mi solisitut?

Si bo tin un keho tokante e manera ku a usa bo datonan personal durante bo solisitut, akudí promé na e doño di trabou ku bo a solisitá serka dje. Si abo i e doño di trabou no ta logra yega na un solushon, tin algun paso adishonal ku bo por dal.